Përkeqësohet ndjeshëm situata humanitare në Rripin e Gazës, për shkak të reshjeve të dendura të shiut gjatë orëve të fundit. Mijëra familje të zhvendosura po përballen me pasojat e motit të keq.
Sipas raportimeve të gazetës Times of Israel, duke cituar zyrën e shtypit të qeverisë së Hamasit, “shiu ka përmbytur 70 mijë tenda që strehojnë banorë të zhvendosur të Gazës në 12 orët e fundit”. Po sipas të njëjtit burim, dëmet materiale të shkaktuara nga kushtet atmosferike të dimrit “vlerësohen në 3 milionë dollarë deri më tani”.
Përkeqësimi i motit ka sjellë edhe dëmtime strukturore në zonat e banuara. Situata e rënduar me strehimin ka nxitur reagime dhe akuza të ndërsjella mes palëve lidhur me hyrjen e logjistikës mbrojtëse në rajon.
Nga njëra anë, “Hamasi akuzon Izraelin se po pengon strehimet dhe pajisjet e tjera të nevojshme për të përballuar shirat të hyjnë në Rripin e Gazës”, duke e bërë përgjegjës për mungesën e mjeteve mbrojtëse ndaj kushtetutës klimatike.
Nga ana tjetër, pala izraelite hedh poshtë këto pretendime dhe arsyeton kufizimet e vendosura në kufi. “Izraeli pretendon se po kufizon hyrjen e materialeve që mund të përdoren si armë”, ndërsa gjithashtu “ka akuzuar Hamasin për plaçkitjen e ndihmës humanitare” të destinuar për popullsinë civile.














